ZORAM TODAY| Aizawl 4th June, 2024 (Tue): Mizoram chhunga kuhva rah chingtuten an kuhva rah thar hralhchhuah kawngah ram dang atanga dan phal loha lakluh a awm thin avangin harsatna an tawk tih hria-in, Home Department, Government of Mizoram chuan heng an harsatna sutkian nan hian hmalakna thar a nei, niin vawiina an thuchhuah ah tarlan a ni.

Kuhva rahte hi Mizoram tualchhunga thar ngei a ni tih certify theitu tur atan kuhva ching tamna hmun District - Aizawl, Kolasib leh Mamit-ah te Certifying Officer ruatna Notification ni 27.05.2024 khan tihchhuah a ni a (Notification hi https://home.mizoram.gov.in/qms atangin download theih a ni). He Notification-ah hian Certificate of Origin pekchhuah dan tur leh he Certificate hman dan tur guidelines hi tarlan a ni bawk thu Home Department chuan a sawi.

1. Certificate dilna hi kuhva rah chingtuten anmahni chinna hmun huamtu Certifying Officer-te hnenah thehluh tur a ni.

2. Certifying Officer/staff ten dilna an dawn atanga hun remchang hmasa berah a hmunah, kuhva chingtu awm lai ngeiin endikna (on-site verification) an nei tur a ni.

3. Heng Certificate an pekchhuahte hi vawikhat hralhchhuahna atan chauh a hman theih ang.

4. Certificate of Origin nei lo kuhva rah phurhte chu ram pawn atanga lakluh anga ngaih tur a ni ang a, man theih a ni ang.

5. Certificate-te hi a dik loa hman a awm tih hriat a nih chuan certificate neitu chu criminal case siamsak theih a ni bawk ang.

He hmalakna hi Mizorama kuhva rah chingtute tan mai ni lovin checkgate-a duty-te leh dan kengkawhtute tan pawh remchan zawkna a nih ngei beisei a ni.